हिमा गाउँपालिका १ का वडा अध्यक्ष तथा हिमा गाउँपालिकाका प्रवक्ता रतन बहादुर शाहीले आफ्नो ३४ औं जन्मदिन समाजसेवा र श्रमदान गरी मनाएका छन् । जुम्ला जिल्लाको हिमा गाउँपालिका १ स्थायी घर भएका शाही बुबा जयधन शाही र आमा गंगा देवी शाहीका माहिला छोरा हुन् । उनी जिल्ला भर मात्र नभई समग्र प्रदेशभर नै एक लोकप्रिय विकासप्रेमी युवा नेताको रुपमा चिनिन्छन।
आजको दिनलाई खास बनाउने उद्देश्यका साथ उनले कालिका आधारभूत विद्यालयका विद्यार्थीहरुका बीचमा जन्मदिन मनाएका छन। सोही अवसरमा उन्ले विद्यार्थीहरूका लागि आवश्यक शैक्षिक सामग्रीहरू कापी कलम र डिक्सनरी वितरण गरेका छन् । सामग्री पाउँदा विद्यार्थीहरूको अनुहारमा देखिएको खुसी र शिक्षकहरूको समर्थनले जन्मदिन साँच्चिकै विशेष बनाएको महसुस गरिएको छ ।
कार्यक्रमका दौरान शाहीले विगत केही समय अघि बर्षाका कारण भत्किएको विद्यालयको खेल मैदान सफा गर्ने कार्यमा पनि सक्रिय भूमिका निर्वाह गरे । गाउँका सम्पूर्ण युवाहरूको सहयोगमा भत्किएको ठाउँको माटो उठाएर राजमार्गबाट गाउँ जाने बाटो मर्मत समेत गरिएको हो । यस पुन्य कार्यमा विद्यार्थी शिक्षक स्थानीय युवा तथा बुद्धिजिवीहरूले श्रमदान गरी ठूलो सहयोग पुर्याएका थिए ।
श्रमदान गरिरहेका युवाहरूले भने हामीले जहिले पनि जन्मदिनको नाममा केक काट्ने र अनावश्यक खर्च गर्ने चलन देखेका थियौं । आज वडा अध्यक्ष शाहीले आफैं अग्रसर भएर समाजका लागि केही गरौं भन्ने सन्देश दिनुभएको छ । यसले हामी युवाहरूलाई समाजसेवामा समर्पित हुन प्रेरणा दिएको छ र वडा अध्यक्ष प्रति अझ बढी सम्मान र विश्वास जागेको छ ।
यस अवसरमा उपस्थित अन्य गन्यमान्य व्यक्तिहरूले पनि वडा अध्यक्षको कार्यको उच्च प्रशंसा गरे । कालिका आधारभूत विद्यालयका प्रधानाध्यापकले भने शाही जी एक उदाहरणीय युवा नेता हुनुहुन्छ जसले आफ्नो व्यक्तिगत खुसीलाई सामाजिक हितसँग जोडेर जन्मदिन मनाउने नयाँ परम्परा बसाल्नुभएको छ । यसले विद्यार्थीहरूमा पनि समाज प्रतिको दायित्वको भावना विकास गर्नेछ ।
वडा अध्यक्ष शाहीको यस अनुकरणीय कार्यले समाजमा सकारात्मक सन्देश दिएको छ । जन्मदिन जस्ता व्यक्तिगत खुसीका दिनलाई समाजसेवामा समर्पित गरेर मनाउने उहाँको यो कदमको सबैले प्रशंसा गरिरहेका छन् ।