जुम्लामा लालीबजार को विशेष च्यारिटी सो बादी समुदायको संवेदना र आमा छोरीको कथा पर्दामा पोखिदै

​जुम्ली दर्शकहरूका लागि एउटा विशेष र भावुक चलचित्र अनुभव नजिकिदै छ। षट्कोण आर्ट्सको ब्यानरमा निर्माण भएको बहुप्रतीक्षित चलचित्र लालीबजार को विशेष च्यारिटी सो आउँदो भाद्र ९ गतेदेखि जुम्लामा भव्य रूपमा सञ्चालन हुने भएको छ।

निर्देशक तथा पट कथाकार यम थापाको सशक्त कथामा आधारित यस चलचित्रले उपेक्षित बादी समुदायको मर्मस्पर्शी पृष्ठभूमिमा आमा र छोरीबीचको न्यानो सम्बन्ध उनीहरूले भोगेका जीवन संघर्ष र समाजको कठोर यथार्थलाई जीवन्त रूपमा पर्दामा उतारेको छ।

​सशक्त अभिनय र मुख्य कलाकारहरू

नेपाली सिनेमा जगतकी चर्चित अभिनेत्री स्वस्तिमा खड्काले यस चलचित्रमा बादी महिला मधुवाला को मुख्य र जीवन्त भूमिका निर्वाह गरेकी छन्। उनको साथमा

रवीन्द्रसिंह बानियाँ
समाइरा थापा
अभय बराल
मुकुन्दकुमार श्रेष्ठ
प्रेम पाण्डे
आशा पौडेल
गोविन्द सुनार

​लगायतका सिद्धहस्त कलाकारहरूको जोडदार अभिनय देख्न पाइनेछ।

​आयोजकको विशेष आह्वान

चलचित्रका कलाकार गोविन्द सुनारले भाद्र ९ गतेदेखि सुरु हुने यस परोपकारी (च्यारिटी) सो तथा सम्मेलनमा उपस्थित भई सिनेमा हेरेर सामाजिक अभियान र कलाकारहरूलाई प्रोत्साहन गरिदिनुहुन सम्पूर्ण जुम्लावासी दर्शकहरूमा हार्दिक अपिल गरेका छन्।